عَظمِـة النيـِـل ...

_ _ عَـظََمِـةْ اَلْنِيِِـل _ _

قبل الهرم موجود والنبض موقفشي
وفوق ضفافك بتيجي حضارة وبتمشي
واهب لِمصر الحياة وميِّتك ترياق
واللي يدوق مَيِّتك يرجع يانيل مشتاق
سِرَّك في بير يانيل خبِّيه وماتقولشي

فوق ضَفِتِيِنَكْْ سَنابل وِجٌوَّة بَطْنَك خير
والخٌضْرة حاضنة الشطوط وف وسطهم بتسير
وبلابل الحٌب بِتغني علي التوتة
بعد الغني والطرب بيقولوا حدوتة
وبعد ماتنتهي بتقف العصافير

شَقّيت طريقك في وسط الصخر ليل ونهار
لا مسِكت أَزْميل ولاَ فَارة ولا منشار
واخترت أصعب طريق شَقِّيته بدراعك
ولا لحد اشتكيت وكتمت أوجاعك
وحضنت في البحر الأبيض لؤلؤات ومَحار

أَسْمَرْ نجاشي وماشي تٌَوَزَّع البسمة
ياغنوة جاية من الحَبَشة ومٌبتسمة
والورد والفل فوق الشط متعاهدين
حتي السنابل بتتقابل في شوق وحنين
فرحت غصون الشجر مالِت مع النسمة

من قبل مينا بتجري ماتعِبْتِش قَط
طار الحمام البناني وفوق ضفافك حَط
بِيْلَقَّطْ الحَبْ ويرفرف علي المية
يلمس جناحه خّدْ الموج بحنيّة
فلاح بِفاسه بيرسم فوق ترابَك خَطْ